خش برجلك اليمين

خش برجلك اليمين


عرض الأصوات ا لرئيسية كُتابنا شريف عبد المجيد يكتب : أوضة الفيران
شريف عبد المجيد يكتب : أوضة الفيران
حجم الخط: شريف عبد المجيد 16 July, 2009 06:57:00



أول مره كنت أسمع فيها عن أوضة الفيران لما كنت فـى أولـى رابع
المشهد كان تقريباً كده ..الطـلــبه كلهم بيتكلموا بصوت عالى وكأن فيه صوت حشره بيطن في وداني
.. ده كان تقريباً لأول أسبوع ليا فى المدرســـــه .. دخلت علينا المدرسه وقالت بمنتهى الحزم _ اللى هيتكلم ح أحطه فى أوضــةالفيران_
.. ما أعرفش ليه ساعتها كلنا سكتنا فجــاءه ..أنا شخصـياً الخوف ملا قلبى من المدرسه ومن الداراسه أصلاً ..


أنا تخيلتها أوضة فى البدروم اللى فى الدور الأرضى..وساعات كنت بحسـبها هى الأوضه بتاعة الفراش ..أصلها كانت دايماً ضلمه ..أنا مش عارف كان بيقعد فيها إزاى ..أيام كتير كنت بحلم إنى اتحبست فيها و المدرسين والطلبه والناظــــر والفراشين كلهم روحــوا وأنا بــس اللى فى أوضة الفــيران أصـرخ ومحدش بيسمعنى وساعتها من غير ما حد يقولي يعني إيه خوف كنت حسيته وعرفت معناه كان أكبر خوف في حياتي مش إني انسي الكتب أو إني مقدرش أدفع المصاريف أو أني ما صليش 00 00 لاء إني أدخل أوضة الفيران000


خلصت الأبتدائيه والحمـد لله مدخلـتش أوضة الفـيران و لا مره ..بعد كده عرفت أنها كانت طريقه كانوا بيخوفوا بيها العيال الصغيره ..طلــعت زيــــها زى أبـو رجـل مسلوخـه وأمنـا الغوله .. لكن كبرت وكبرت أوض الفيران .. كنت فاكر إنى اتخلصت منها للأبد .. لكن طلع أن الحياه فيها فيران كتير زي الخوف من الطرد من العمل الخوف من الكلام فـى السياســه الخوف من الأغتراب والوحـــده و الــــحزن...
الخوف من الفشل الخوف من إنك ما تستمرش بنفس النجاح الخوف من إنك ما تنجحش أصلاً الخوف من المدير000 الخوف علي اللي تملكه والخوف من الأشياء اللي تملكك000 الأحـلام اللـى بنكتشف إننا مش هنقدر نحققها وأن العمر بيتسرب بين أدينا فجأه وأن الخير صعب قوي ينتصر علي الشر وأن الحق مش هوه دايماً اللي بيظهر وأزاي بيختلط بالباطل وأنك لازم تقبل كل الألوان اللي بين الأبيض والأسود هي دي أوض الفيران الحقيقيه الي لقيتها حواليا وعرفت أن أوضه الفيران كانت أبسط بكتير وأسهل لأنها كانت خوف مجسم له شكل معين وممكن تتجنبه بسهوله لو عملت الواجب او سمعت كلام المدرسه وكلام بابا وماما إنما الخوف دلوقتي مابقاش مجسم ولا له شكل ولون وحجم معين وعلي رأي المتصوفين لما قالوا رب جميل منظر ويطوي داخله كل قبيح0


للأسف أوضة الفيران وأبو رجل مسلوخه وأمنا الغوله طريقه سهله جداً لردع الطفل وتخويفه زي أفكار كتيره كانوا بيقولوا لنا عليها ..وكنا بنحس إنها مسلمات ونصدقها على إنها حقايق ..ياترى كان عندهم حق؟ ..ياترى ... مش كان من الممكن المدرسه ماتخليناش نعيش كل لحظات الرعب دى 000صحيح هى ماضربيتش حد فينا بس الخوف والرعب اللى زرعته فينا ده ..فى حد ذاته مش إنتهاك لطفولتنا ولطريقتنا فى مواجهة الحياه وياتري نظام التعليم القايم علي التلقين والنصح والإرشاد ممكن يطلع طالب عنده قدره علي الابتكار000 !!..كان فيها إيه لو ساعدونا يكون عندنا ثقه أكبر فى نفسنا كنا هنتعامل مع الحياه بشكل أكثر واقعيه وكنا هنعرف أن فيه شر وخير غلط وصح ثواب وعقاب بس مفيش أبداً أوضة فيران غير الخوف اللي هيكبلنا لو ماواجهنهوش 0 وأن أصعب ناس ممكن تقابلهم في حياتك همه اللي أوضة الفيران بقت جواهم ومش عارفين يتخلصوا منها أو اللي مستنين حد زي جودو في مسرحيه صمويل بيكت الشهيره عشان يجي يحل كل مشاكلهم وهما كل دورهم إنهم يفضلوا في إنتظاره عشان يخرجهم من أوضة الفيران0


ملحوظات أخيره عن أوضة الفيران :

أكتر عيال كنت بكرههم همه بتوع الحكم الذاتي اللي بيقفوا علي الحنفيات وعلي أبواب الفصول ودورات المياه كانوا ييخوفونا ويهددونا بكلمه هوديك للناظر


تفتكروا إيه الشبه بين الفيل هورتون وجمال بطل المليونير الفقير و سانتيجو بطل ساحر الصحراء ؟

من وجهه نظري الثلاثه ما مشيوش ورا القطيع وكل واحد فيهم واجه مخاوفه وصمم يكمل طريقه للأخر ولو كان أي واحد فيهم استسلم للخوف ماكنش هرتون انقذ المدينه اللي عايشه في زهره برسيم ولا كان جمال ربح الميلون وبقي مجرد طفل شوارع زي أخوه اللي شبه التوربيني ولا كان سانتيجو لقي الكنز بتاعه النصيحه اللي حاول التلاته ينقولهالنا هي : " اتبع قلبك وواجه مخاوفك " .... وأنا فاكر كويس لما سجلت لقاء مع الأديب الكبير " بهاء طاهر " للفضائيه المصريه سألته تفتكر أيه سر أن ساحر الصحراء باعت أكتر من أربعين مليون نسخه وقالي ساعتها إجابه من الروايه -أن اكثر الأشياء التي تستعصي علي التفسير هي أبسطها-