اهرام الجمعه عدد 2 يناير2009









فرق توقيت
بقلم: شريف عبدالمجيد
دقت ساعة الحائط الكبيرة الموجودة في صالة الشقة أربع دقات متتالية‏.‏ خرج منها الببغاء المتهالك ـ الذي مازال يعمل لأسباب لا يعلمها أحد حتي الآن ـ دخلت هي بخطوات متسارعة حتي لا توقظه‏..‏ صحا من نومه ـ الخفيف جدا ـ اعتدل واتكأ علي مسند الكنبة التي ينام عليها‏,‏ نظر اليها وكأنه لا يعرفها أو فوجيء بوجودها أمامه
انتي مين
أنا سعاد
سعاد‏!‏ وعايزه إيه يا سعاد

أنا سعاد‏...‏ سعاد بنتك يا بابا‏,‏ قالت هذه الكلمة بالقرب من أذنه اليسري التي يسمع بها أفضل من أذنه اليمني
طيب أنا خارج‏.‏
خارج رايح فين بس‏.‏

أصلي لازم أروح الشغل‏...‏ ومش عايزهم ياخدوا فرصة ويأخروا ترقيتي‏.‏
شغل‏!!‏ شغل إيه بس يا بابا أنت علي المعاش بقالك عشر سنين‏.‏

انتي هتعملي زيهم‏...‏ سبيني أخرج بس‏..‏ أنا كمان لازم أنقل سمير من جامعة اسكندرية لجامعة القاهرة‏...‏ أنا عايزه قدام عيني‏..‏ ربنا كرمه ودخل هندسة ودي كلية مصاريفها كتير فبدل السفر والبهدلة أنقله أحسن
إنتي عندك عيال؟

أيوه يا بابا‏..‏ أحمد إنت سميته علي اسمك وعندي سلمي أقولك إيه بس‏,‏ ما انت اللي مربيهم‏,‏ وكنت دايما بسيبهملك إنت وماما الله يرحمها
إيه
أيوه عندي عيال

ربنا يحميكي إنتي باين عليكي طيبة‏,‏ بس خللي بالك من نفسك‏,‏ الناس بقت وحشة قوي‏.‏
حاضر يا بابا‏.‏
إيه
بقولك حاضر

أنا عندي بنات زيك‏...‏ ربنا يستر علي ولايانا‏..‏ أمال فين الجزمة
هناك أهيه

أنا لسه هعدي علي سعيد أخويا‏,‏ وبعدين هشتري البقالة للبيت أحسن فاطمة ما بقتش تقدر تنزل زي زمان‏,‏ الله يكون في عونها‏.‏

لم تعرف كيف ستقول له ان سعيد الآن في السعودية؟ وأن فاطمة أمها وزوجته ماتت منذ خمس سنوات‏.‏ لانه سيدخل ساعتها في نوبة بكاء لا حد لنهايتها‏,‏ هل ما هو فيه أفضل من تذكره لكل شيء؟
طب استني أنزل كمان شويه الدنيا حر موت‏..‏ زي ما أنت شايف

يعني الشغل هيستناني‏...‏ حر إيه وبتاع إيه وبعدين أنا قاعد هنا بمزاجي وهنزل بمزاجي هوه أنتي هتمنعيني‏.‏

لا طبعا العفو يا بابا‏...‏ طب كل حتة اللحمة دي وأشرب الشربة وأعمل اللي انت عاوزه
يعني أشرب الشربة؟
أيوه أشربها

أمال فين سلوي؟‏...‏ هي مش باينه ليه هي مش هتروح المدرسة النهارده‏.‏
مدرسة إيه بس‏...‏ سلوي دي ولادها في الثانوية دلوقتي
ما شاء الله
ايوه يا بابا وهي مع جوزها في قطر

فين؟
في قطر‏.‏
قطر‏!!‏
أيوه قطر

طب تعالي الناحية دي عشان أسمعك كويس‏.‏
كويس كده
كده أحسن

أشرب الشربة لو شربتها كلها هحكيلك حكاية هتعجبك قوي‏.‏
حكاية إيه‏!‏

حكاية العصفور اللي لف تلت بلاد وهو محبوس في القفص
قفص إيه وعصفور إيه

العصفور اللي لقوه مع بنت ملك‏,‏ سلطانه مالوش حدود وخسر حربا كبيرة‏..‏ راح الجنود المنتصرون خدوا العصفور وعطوه لبنت الملك بتاعهم‏...‏ عصفور مفيش أخوه ريشة دهب وريشة فضة لكنه كان محبوسا‏.‏
خد بقي حتة اللحمة دي
وبعدين حصله إيه يعني
هوه مين؟
العصفور يابنتي‏.‏

الأميرة قالت لازم أفكه من أسره‏,‏ إيه فايدة جماله لو مكنش الناس تشوفه
والله بتفهم برضه

وراح طاير‏..‏ قعد يغني علي شباكها أتاريه كان عصفور مسحور وخلا كل اللي في المدينة يبكوا من كتر السعادة ومحدش منهم نسي صوته‏...‏ عارف ليه؟
ليه؟

لأن ده صوت الحرية‏...‏ أصل الطيور لما بتكون محبوسة ماحدش بيقدر يحس بحزنها إلا إللي بيحلموا يطيروا في الفضا الواسع
الشربة دي باردة
لا والله دي سخنة
يعني أنا بكذب

العفو يا بابا بس أنا خايفة توقعها علي نفسك هسخنهالك تاني
طيب إيه البلد التالتة اللي رحها
دي بلد ما فيهاش طيور محبوسة كل شيء فيها حر وجميل
ياه‏....‏ مفيهاش طيور محبوسة خالص

لا‏....‏ خالص‏..‏ خد بقي الدوا
كل الدوا ده ليه‏....‏ الشافي هوه الله
ونعم بالله بس عشان تخف
منا زي البمب والحمد لله‏...‏ تصدقي إمبارح حلمت حلم غريب قوي
حلمت بإيه

حلمت إني في جنينة كبيرة جدا لكن كل شوية بقابل واحد شبه يوسف وهبي في فيلم سفير جهنم‏.‏
وبعدين
ولا قبلين

جريت منه لكنه كان دايما بيظهرلي‏,‏ خفت وجسمي كله انتفض وكنت عايز أعيط وأصرخ بس صوتي فضل محبوس ومش عايز يطلع‏.‏
يا ساتر
والله العظيم
أنت بس اقرأ قرآن قبل ما تنام
إن شاء الله‏...‏ وعلي كده إنتي عارفة ولادي كلهم

أيوه طبعا‏...‏ ترجع بطبق الشربة والدموع تملأ مقلتيها‏...‏ ربنا يخليك لينا
إنتي بتعيطي‏..‏ هو فيه حد مزعلك
لا أنا مش بعيط
والله الواحد كان نفسه يبقي عنده بنت زيك كده

تضع الحذاء أسفل الكنبة التي ينام عليها لأنها تعرف أنه سينام أربع ساعات متتالية بعدما أخذ الدواء وستترك مفتاح الشقة عند الجيران وسترجع لبيتها قبل أن يعود زوجها من عمله‏,‏ حيث إنها قضت يومين عند والدها‏,‏ وهذا دور كريمة بنت خالتها وزوجة أخيها في المبيت معه‏.‏

الود ودي مسبكيش بس أعمل إيه في العيال ومحمود وطلباته اللي ما بتخلصش أنا عارفة هروح الشقة هلاقيه مبهدلها هوه والعيال حتي شرابتهم مسيبكش‏,‏ وكريمة الله يجزيها بتخدم وهي متضررة ده أنا لو قلت الي بتقولهولي لجوزها كان زمانه طلقها‏,‏ واللي زاد وغطي انها بتقول إنك يا بابا بتعملها علي نفسك طب ما أنا بقالي يومين أهه معملتش حاجة ولا في أي يوم أنا بيت فيه معاك القصد مع السلامة‏.‏

تغلق الأنبوبة وتطفيء نور الصالة وتخرج من الشقة وتغلق الباب خلفها بينما دموعها تسيل مرة أخري دون إرادة منها ووقع خطواتها علي البسطة العريضة المتهالكه مازال مسموعا داخل الشقة‏.‏

صور من معرضي القادم انشاء الله وهو معرض مشترك مع فنانه استراليه مميزه وسوف اواليكم بالتفاصيل قريبا

حرقوها

آثار جانبيه
: ها هو قد نجا من الموت بأعجوبة بعدما ظنوا أنه في عداد الأموات ولم تترك جلطته الخطيرة سوي بعض الآثار الجانبية‏.‏كفقده للنطق والشلل وعدم تذكره لأي من أحداث حياته الهامة أو التافهة ولم يكن عليهم سوي مراقبة قرح الفراش حتي لاتغتاله البكتريا اللعينة والطفيليات التي ستتكون جراء استلقائه علي الفراش لسنوات لايعلمها أحد‏.‏

عسر هضم

سيدرك أن عسر الهضم سيكون مرضه المزمن الذي سيتعايش معه وكلما ازداد مرضه سيتذكر أيامه الخوالي‏,‏حيث كانت غازاته ذات الاصوات الضخمة مصدر فرح لاسرته حينما كان صغيرا‏,‏ صار عليه ان يكتمها بصعوبة ليثبت انه رجل صالح وسيتأكد من ان علب الفوار المتعددة التي يحملها معه هي عزاؤه الوحيد والدليل علي انه اصبح رجلا ناضجا‏.

‏عرض خاص

الرجل الذي يخطب في الجماهير كل يوم متحدثا عن القضايا الكونية وصراع الحضارات مرتديا بزته الانيقة ومنديله الأحمر في جيبه الصغير‏,‏ ويشير بيده ليحيي الجموع‏(‏ لم اتأكد أبدا إذا كان حافي القدمين أو أنه يلبس حذاءين مختلفي الألوان‏)‏ إلا أني كنت أصفق له مثل الجميع‏.

‏ثورة مضادة

كان الصوت خافتا لكنه مستمر بشكل جعله يفكر ماذا يمكن ان يتواجد داخل سيفون الحمام؟ هو لايستطيع القيام الان ولايمكنه ان يتجاهل ذلك الصوت الذي بدأ في التصاعد‏.‏ توقف عما كان يفعله ارتدي ملابسه‏,‏ فتح الغطاء‏,‏ خرجت منه الضفادع تتقافز في كل مكان جري مسرعا بينما الضفادع تعربد وكأنها ستقتله‏,‏ اتجه ناحية البلكونة فلا يمكن ان تكون الضفادع في البلكونة او الشارع في الثلاجة او الاسفلت في الغسالة‏.‏ او ان تكون منظمات المجتمع المدني هي التي تصنع العجة‏.‏ النهارده الثلاثاء وانا اسمي شريف الحمد لله لم اجن بعد‏.‏ هكذا حدث نفسه لكن الضفادع‏....‏ الضفادع في كل مكان كفيلم‏(‏ اوليفر ستون‏)‏ بالضبط لكن السماء لم تمطر ضفادع بعد‏.‏ وهو ما جعله يشعر ببعض الامل وجد الضفادع تطارد الناس في الشوارع وفي البيوت بل وتقود السيارات ايضا ولكن لماذا لم تعد تهاجمه هو شخصيا‏....‏ اكتشف السبب اخيرا‏,‏ فهاهو يقفز ويصدر اصواتا قوية كضفدع نشيط يبحث عن اقرب بركة ليعيش فيها‏.

رسائل‏

الرجل الميت الذي يواظب علي بعث رسائله لاصدقائه وللجهات العليا ولاولاده وزوجته ويدلي بصوته في الانتخابات ويشارك في الافراح والمآتم شكل لغزا للجميع حيث اتخذه بعضهم وسيلة للتبرك واعتبره البعض الآخر احد مجانين العالم السفلي‏,‏ قرروا جميعا تجاهله باعتباره رجلا ميتا لايمكن حسابه علي افعاله او علي ردود هذه الافعال ولأنه في النهاية وبعدما سيصاب بالملل سيكتشف انه مجرد رجل ميت وربما يكون اكثر سعادة من كثير من هؤلاء الأحياء الذين لايعرفون لحياتهم سببا‏.

اختيار

الشبح الذي انتقم ممن قتلوه ومثل بجثثهم جميعا لم يستطع ان يعود لقبره او ان يصير انسانا مرة أخري بعدما انهي مهمته الانتقامية بنجاح منقطع النظير‏.

‏نسيان

قتل اخاه وتزوج زوجته‏.....‏ انجب منها اولادا كثيرين الا انني لم اجد أيا منهم يتذكر عمه هابيل‏.‏

حيرة

ابحث عن نظارتي في كل مكان كلما حاولت الخروج‏.‏ جربت ان اربطها بسلسلة لكنني لم اتواءم أبدا مع هذه الفكرة‏.‏ صنعت واحدة اخري اضعها دائما في الشنطة التي اخرج بها لكنها غالبا ما تنكسر عدساتها بفعل الاصطدام بالكتب‏.

‏فرحة

الديكتاتور الذي تنازل فجأة عن عرشه وارجع الحقوق لاصحابها ووافق علي ان يحاكم علي ما فعله اسعده جدا انه استيقظ من حلمه السخيف‏.‏دعابةالمهرج الذي رأي رءوس تسعة من زملائه في اركان الساحة التي يتوسطها الملك المكئتب قرر ان تكون نكتته الاخيرة عن الملك ذاته والذي اضطر للضحك امام الجماهير ليثبت لهم مدي تمتعه بروح الدعابة بعدما اشار لوزيره المخلص بأن يدس السم للمهرج السمج فور انتهاء العرض‏.‏

حب في خمس لقطات

لقطه اولي

بدأت علاقتهما معا في خضم لحظة يهرب فيها كل منهما من علاقات سابقة اتفقا علي المصارحة ولكنهما كذبا علي بعضهما‏.

‏لقطة ثانية

استمرا في الخديعة‏.‏

لقطة ثالثة

كشف كل منهما عن ذاته‏,‏ هو فشل قبلها لانه لم يكن يحب بالفعل‏.‏ وهي فشلت قبله لانها دائما ما كانت تبحث عن شخص ذاته تقدس ذاتها‏.

‏لقطة رابعة

استمرا في المحاولة وفي فتح صفحات جديدة‏.

‏لقطة خامسة

اكتشافا اخيرا ان الحب الذي يموت بالسكتة لاتنفع معه محاولات الانعاش‏.

‏فراق

ستبكي كابينة التليفون كلما حاول ان يستخدمها شخص اخر غيرهما‏.‏سيحكي الطريق للسائرين فيه عما رآه وشاهده‏.‏سيعلن اسفلت الشارع عن تذمره وحزنه الأبدي‏.‏ستندهش اشارات المرور جدا لحظة مرور احد العاشقين السابقين لطريقه وحيدا‏.

‏نبوءة

بعد خيبات عديدة وانكسارات لا حد لهاستجد مسراتك الخاصة‏.‏ ولكن قلبك سيكون قد ادمته تلك الثقوب الصغيرة والجراح التي لم تندمل‏.‏وستعرف وقتها ان الوقت المتبقي لتلك السعادة هو اقل من القليل ولكنه كافي جدا لان تموت من الفرح‏.‏

محبة

في اليوم العاشر من الغيبوبة بكوا من اجله‏.‏ في اليوم الخمسين شعروا بالضجر في اليوم المائة نزعوا عنه الاسلاك‏.

‏رونق

لن يشك احدهم ابدا في ذلك الرجل الذي يمتلك اربعة قصور ومائة فدان وله عشرة اولاد وثلاثون حفيدا وخمسة مصانع وسبعون مليونا وقناة فضائية وتزوج ست مرات من ممثلات وداعيات وراقصات انه مدين لثمانية بنوك وانه سيهرب غدا من قاعة كبار الزوار وسيترك المصريين اكثر فقرا مما هم فيه‏.

‏صراع

الجندي الذي يقتل الاطفال لم يعذبه سوي كثرة ضغطه علي الزناد‏.‏

خرافة

الشجرة التي قدسوها منذ آلاف السنين‏.‏ ورووا حكايتها بروايات مختلفة‏.‏ وصيغت حولها الاساطير لم تصبهم اللعنات عندما استأصلوها

طلاق

اخذوا الملاعق‏,‏ السكاكين‏,‏ البوتاجاز‏,‏ والغسالة الفول اتوماتيك‏,‏ الثلاجة‏,‏ والدش والسخان‏,‏ كل الستائر والنجف والمراتب والخلاط‏,‏ المكواة والاباجورات والنجف وحجرة السفرة ولكنهم تركوا لي اللحظات الحميمة واللحظات التعيسة وصور الزفاف والجنين الذي مات في شهره الرابع وصور التحاليل والأشعة وهو ما جعلني اشعر بأنني لم أخسر الكثير‏.

‏حماية

حاصر الجنود المكان‏,‏ نزلوا من سياراتهم‏,‏ لامست احذيتهم الغليظة اسفلت الشارع فالقوا الرعب في نفوس الجميع‏,‏ كسروا باب البيت‏,‏ اتجهوا الي غرفة الكاتب‏,‏ انتزعوا منه اوراقه قبل ان يكتب فكرته الجديدة حيث كانت كاميرا المراقبة التي وضعوها خلسة في زوايا سقف غرفته قد سجلت عودته للكتابة‏.

‏خداع

لم يتعرف عليه أي مشاهد من الجمهور بعدما انهي عرض العرائس الذي يقدمه كل يوم لكنهم صفقوا له بحرارة عندما لبس القناع مرة أخري‏.‏




هذه القصه من مجموعتي القصصيه الجديده التي ستصدر قريبا ونشرت بجريده الاهرام يوم 23اغسطس 2008

واحده من صور معرض حيطان اللي اقمته في ساقيه الصاوي وتم عرضه ايضا بقبه الغوري

يا تري اعرض ايه ولا ايه هوه ده السؤال الصعب اللي ممكن يواجه الفنان قبل اختيار لوحاته لمعرض معين وهي دي الحيره اللي حسينا بيها انا وصديقي الفنان التشكيلي معتز الامام قبل افتتاح
معرضه الشغل كله كان جميل وفيه حال ابداع في اللون واللخطوط
لكن ده ممنعش ان احنا نسأل السؤال ده يا تري ايه اللي اعرضه وايه اللي خارج اطار حاله بقيه الوحات

انت برتو ولا مارينا


اول ما تسيب طريق إسكندريه الصحراوي وتخش علي طريق العلمين الاسم الحركي لطريق مارينا وقري الساحل الشمالي طريق بمواصفات مختلفه مظبوطه علي المللي وكمان عربيات الاسعاف راكنه علي جناب الطريق لان الي بيسافروا فيه مش اي ناس يا ريت الفكره كانوا يطبقوها في الطريق الشعبي بتاع الغلابه اللي رايحين العجمي وشاطئ النخيل والهانوفيل بس دول راحت عليهم .

المهم من كتر جمال الطريق كانك قاعد علي ريش نعام والاعلانات عن شواطئ جديده الحجز فيها بالملايين والاستثمار
بتاع الشركات العامله في الامارات قررت تنوع
مصادر دخلها والناس بتوع الساحل الشمالي مش ااقل ابدا من بتوع دبي
انما اللي هيلفت نظرك مش بس جمال البنات ولا حفلات السهر لحد الصبح او جنون الاسعاروبس انما لما تدخل بقي مارينا نفسها هتلاقي نفسك وسط كنتاكي وباسكن روبنز وكل المطاعم ومحلات الملابس المشهوره يعني كأنك في قلب القاهره بس من غير المتطفلين اياهم
وكان دايما الناس في مارينا بيصعب قوي عليهم بتوع ماربيلا وبتوع ماربيلا بيصعب عليهم قوي بتوع مراقيا وكمان في كام قريه كده علي الاقد ولما نشوف مثلا ان حسب الله الكفراوي كان افتتح ماربيلا بتمانين شاليه بس في 1988 وتعرف حضرتك انها دلوقتي اتعدت ال600 شاليه هتعرف علي طول ان الموضوع ده سبوبه كبيره واستثمار بيعدي المليارات وفكك بقي من إسكان الشباب وعايزنها تبقي خضره والكلام ده . مطولش عليك وربك بيسلط ابدان علي ابدان وبتوع مارينا طلعلوهم بتوع بورتو مارينا مبني كده زي عمارات عباس العقاد شقق سكنيه تخيل بقي انك تدفع اتنين مليون في شقه وتجبلها تكييف مع ان المفروض انها مصيف واتفرج بقي يا حلو علي خناقات الشغالات اشي فلبيني علي مصري علي سوداني حاجه كده مناسبه لعصر العولمه انما اهي تقليعه جديده واول سؤال هيتسالك من اصحابك في الساحل الشمالي انت بورتو ولامارينا انصحك في الحاله دي علي طول تقولهم بورتو والاهتنزل من نظرهم وطبعا الفنان العالمي عمرو دياب مكدبش خبر وركب الموجه اصله مصيف بقي وقرر ان يعمل حفلاته في بورتو اشمعني هوه يعني يا ريت بقي اذا ربنا كرمك وعرفت تروح هناك اعمل نفسك فيها علي من بورتو وبعد كده لو حد قالك ان البلد فيها بطاله وازمه جواز وازمه سكنه قوله كلمه السر بورتو بورتو لانها التجسيد الحقيقي علي كم اختلال الثروه وتوزيعها في بلدنا ولما كل الناس دي بورتو امال احنا مارينا ليه